Ibandla leMDC-T lithi lokhu lisalolonga amaphepha okusa emthethwandaba licela ukuba uvimbe uNkosikazi Grace Mugabe ukuthi aqhubeke elokhu esabela uzulu impahla kahulumende ebalisa amatilakita.
Unkosikazi Mugabe ophakathi komkhankaso wokuhlangana lozulu upha abantu ukudla lempahla etshiyeneyo ebalisa izigqoko, inhlanyelo lamatalakita athunyezwa nguhulumende wakwele Brazil.
Uhulumende wakwele Brazil waphathisa uhulumende we Zimbabwe ngamatalakita angamakhulu amathathu, 320 phansi kohlelo oluthiwa Zimbabwe-Brazil More Food for Africa Program.
“Akulamsebenzi lanxa abantu besithi ngiyabathenga ngalokho engibapha khona. Kungcono ukuthi ngilithenge kulomuntu ongasoze aliphe lutho," uNkosikazi Mugabe watshela umhlangano awenza eRushinga esigabeni seMashonaland Central.
Ibandla leMDC-T lithi okwenziwa ngunkosikazi Mugabe akulunganga ngoba engasiso siphathamandla sikahulumende.
Lokhu kwesatshelwa ukuthi kungabangela ukuthi abandlulule aphe abasekeli bebandla le Zanu PF kuphela.
Isikhulumeli sebandla leli, uMnu. Obert Gutu utshele iStudio Seven ukuthi basalolonga amaphepha abo njalo bazakuya emthethwandaba ngasiphi sikhathi besethula loludaba.
Ingcwethi kwezomthetho, uMnu. Job Sibanda yena uthi ibandla leMDC-T ngempela lilodaba olulesisindo, olulakho ukungeyiswa emithethwandaba.
