amalinks wokungena

Breaking News

Ibandla LeMDC-T Liqoqa Ukutshengisela Lisola uMugabe eRusape


MDC-T supporters in Gweru
MDC-T supporters in Gweru

Ukutshengisela okukade kuqoqwe libandla le MDC-T edolobheni le Rusape kusasa kulakho ukungenziwa kulandela ukubotshwa kwesiphathamandla salelibandla esigabeni se Manicaland, uMnu. Tazviona Marima obehambisa incwadi yokucela imvumo emapholiseni.

Lelibandla beliqoqe ukutshengisela lokhu lisithi lisola ukwehluleka ukuguqula umnotho okwenziwa libandla le Zanu PF.UMarima ubikwa etshaywe ngapholisa kabuhlungu njalo amagqwetha labanye bebandla lakhe bayalelwa ukungena enkambeni yamapholisa ukuthi bambone.

Isikhulumeli sesigaba se Manicaland, uMnu. Trevor Saruwaka utshele iStudio Seven ukuthi uMarima kuthiwa uzasiwa emthethwandaba kusasa kodwa akwaziwa ukuthi calabani aletheswayo.

"Isiphathamandla samapholisa, uDispol Gwangwava nguye otshaye uMarima encediswa ngamanye amapholisa ngemva kokuba uMarima eze enkambeni yamapholisa ezobika ngokutshengisela kwakusasa," kutsho uSaruwaka.

Imizamo yokukhuluma lamapholisa yehlule. Oqoqa inhlelo zebandla leMDC-T, uMnu. Abednico Bhebhe utshele iStudio Seven ukuthi ibandla lakhe seliqale ukuqoqa ukutshengisela emadolobheni amancane.

Ukuhlaziya loludaba sixoxe lengcwethi ecubungula ezombusazwe, uMnu. Nhlanhla Dube othi ukutshengisela akusoze kuphumelele ngoba uzulu ezidingela ukondla imuli hatshi ukutshengisela.

"Amapholisa ayabe ekhona ... ukutshengisela lokhu akubi lomvutho okuwudingayo. Kuyaba ngumlilo wamaphepha," kutsho uDube.

please wait

No media source currently available

0:00 0:02:10 0:00
Lapho esitholakala khona

XS
SM
MD
LG