Inkokheli yebandla le ZANU PF eMashonaland East ithethe ithuba lokukhankasela lelibandla esililweni sikaGeneral Solomon Mujuru isithi kumele ibandla leli lisebenze nzima ukuthi zithole izikhundla kukhetho oluzayo.Intathelizindaba. Kubika intathelizindaba yeStudio 7 uMavis Gama oye koSadza lapho izihlobo labangane bebevalelisana lomuyi.
Kusenjalo, umlimi omhlophe uMnu. Guy Watson Smith owayengumnikazi wepulazi ebelihlala umuyi uMnu. Solomon Mujuru uthi umangoyi uyasola indlela abhubhe ngayo ngoba indlu le yakhiwe ngendlela eyenza ingalumathi masinyane umlilo njalo kulendlela ezinengi zokuphuma kulindlu ngesiphangi nxa kuthe kwaba lengozi enjengale.
USmith uthi kusobala ukuthi kunengi okuhluphayo kwezombusazwe elizweni ngendlela athathelwa ngaye ipulazi lakhe, langendlela uMujuru abhubhe ngayo.
Ipulazi lika Smith lathathwa nguMujuru ngomnyaka ka 2001 phansi kohlelo lukahulumende olokwaba kutsha umhlabath njalo uSmith utshele iStudio 7 ukuthi walahlekelwa yimpahla enengi ngemva kokuthathelwa ipulazi lakhe, egoqela inkomo, inyamazana, lokokusebenzisa epulazini.
UMnu. Rejoice Ngwenya, ingcwethi ecubungula ezombusazwe utshele uSithandekile Mhlanga we Studio 7 ukuthi akulandlu engehlulwa ngumlilo.