Ibandla le ZAPU lithi liyamsola uhulumende ngomthetho wakhe awuthi ngowokuthuthukisa abensundu, owe Indigenization, ngoba wandulele ukhetho kanye lohlelo lokulotshwa kutsha kwesisekelo sombuso.
Embikweni eliwethulayo, ibandla leli lithi kusobala ukuthi ibandla le ZANU PF liyananzelela ukuthi umbuso walo ususemaphethelweni ngakho lifuna ukuzinothisa lingakaphumi embusweni, ngokuthatha amankampani abamhlophe, kanye lamatshe aligugu enjiwa elizweni.
Kusenjalo, ugatsha lwe ZAPU kwele Bhilithani luthi lona lujonge ukuncedisana lebandla eZimbabwe kunhlelo ezitshiyeneyo zokuthuthukisa lelibandla.
Ibandla leli liphakathi kokulungiselela umhlangano walo omkhulu we Congress, njalo lisakhetha abameli balo ezigabeni ezitshiyeneyo zelizwe.
Okunengi ngaloludaba kuphume kungxoxo uSithandekile Mhlanga we Studio 7 ayenze loMnu. Zenzo Nkomo, obona ngokwethulwa kwembiko kugatsha lwe ZAPU eBhilithane.