Ibhanga le Renaissance Capital, eliyingxenye ye Rennaisance Group International njalo elidinga ukusungula amabhizimusi emazweni agoqela ele Russia, Africa, Eastern Europe le Central Asia lithi amankampani aphetsheya atshengisa ukuzinikela uku sungula amabhizimusi kwele Zimbabwe.
UNkosikazi Daria Khilenkova isiphathamandla salelibhanga, lona eligxile e Russia, utshele iStudio 7 ukuthi inkampani yakhe isanda kuqhatsha uNkosazana Nothando Ndebele, isizalwane seZimbabwe ukuthi akhokhele ugatsha olusebenza ezwekazi le Africa ngendlela yokuthuthukisa umnotho wamazwe akulesisigaba abalisa i Zimbabwe, i Kenya, iGhana, iZambia, i Nigeria le South Africa.
IStudio 7 ayenelisanga ukukhuluma loNkosikazi Ndebele ngoba ibhanga leli lisithi ubengakaqalisi umsebenzi.
UNkosikazi Yvonne Mhango isiphathamandla esicubungula ezomnotho ezwekazi le Africa kulelibhanga, utshele uSithandekile Mhlanga weStudio 7 ukuthi ibhanga lakhe liziqhenya ngokuthi yilo elakhuthaza inkampani ye ASSAR ukuthi ithole ingxenye yesabelo kweye zisco steel.