UMongameli Mugabe uthi eleBhilithani lamanye amazwe eEurope kasoze avunyelwe ukuthumela iziphathamandla zawo ukuzebona ngokuqhutshwa kokhetho elizweni ngoba eyizitha zeZimbabwe.
UMugabe wethule amazwi la ngoLwesine esamukela ummeli weBhilithani eHarare uNkosikazi Deborah Bronnert.
Wengeze wathi izijeziso ezafakelwa yena lamanye amalunga eZanu PF yiBhilithani leEuropean Union ziveza sobala ukuba amazwe la ayizitha zelizwe leZimbabwe, ngalokho akudingeki ukuba abekhona ngesikhathi sokhetho.
UMongameli Mugabe uveze ngeviki edluleyo ukubana ukhetho luzakwenziwa ngoMbimbitho ngomnyaka ozayo lanxa nje engakavumelani labanye bakhe kuhulumende womanyano phezu kwalokhu.
AbeMDC bathi kaqondanga amazwi kaMugabe okuthi eleBhilithani leEuropean Union kasoze avunyelwe ukuthumela abazobona ngokhetho ngoba kungayisiso sinqume amele asithathe eyedwa.
Isikhulumeli seMDC ekhokhelwa nguMnu Welshman Ncube, uMnu Nhlanhla Dube utshele iStudio 7 ukuba uMugabe uyaziphuphela njalo imbiko yakhe ayimelanga ilalelwe nguzulu.
Amazwi kaDube agcizelelwe nguNkosazana Thabitha Khumalo, ongumsekeli wesikhulumeli secele leMDC elikhokhelwa nguMnu Morgan Tsvangirai.
