amalinks wokungena

Breaking News

IMDC Ekhokhelwa NguMnu. Morgan Tsvangirai Isola Induna Negomo Ngendlela Abize Ngayo Umkhokheli Walelibandla


Icele le MDC elikhokhelwa nguMnu. Morgan Tsvangirai selisole kakhulu induna yesigaba se Mashonaland Central uChief Negomo ngokufuna ukumema uTsvangirai yona ngokwayo endaweni yezithunywa ngodaba lokulobola uNkosazana Locadia Karimatsenga Tembo lisithi kusobala ukuthi induna le isetshenziswa libandla le ZANU PF.

Icele le MDC elikhokhelwa nguMnu. Morgan Tsvangirai selisole kakhulu induna yesigaba se Mashonaland Central uChief Negomo ngendlela abize ngayo uTsvangirai yena ngokwakhe endaweni yokuthuma izithunywa zakhe ukuthi azomthonisisa ngodaba lokulobola uNkosazana Locadia Karimatsenga Tembo lisithi kusobala ukuthi induna le isetshenziswa libandla le ZANU PF.

Induna le, efike emahosisini ebandla leli ngolweSithathu, ifuna uMnu. Tsvangirai ahlaliswe phambi kwedale layo ngempelaviki ezayo, athonisiswe ngoku “lobola” uNkosazana Tembo ngenyanga kaLwezi, okulinyathelo elizilayo ngesiko lesiShona.

Udaba lolu belusegudwini kumaviki ambalwa edluleyo, uMnu. Tsvangirai ephika ukuthi wamlobola uNkosazana Tembo, esithi wahlawula indleko eziphathelene lokuthi uzithwele kuphela, kodwa imuli yako ntombazana lo isithi uTsvangirai wamlobola ngempela.

UMnu. Cairo Mhandu, isiphathamandla sebandla leZANU PF obekhaphe induna uNegomo utshele iStudio 7 ukuthi UMnu. Tsvangirai engala ukuya edale lenduna uzabizelwa amapholisa.

UNkosazana Thabitha Khumalo, umsekeli wesikhulumi salelibandla utshele uSithandekile Mhlanga weStudio 7 ukuthi kusobala ukuthi induna le isetshenziswa libandla le ZANU PF ngoba ibikhatshwe ngamalunga alelobandla.

XS
SM
MD
LG