Icele le MDC elikhokhelwa nguMnu. Morgan Tsvangirai lithi liyasola kakhulu ukubotshwa kwamalunga enhlanganiso ye Women of Zimbabwe Arise ayisitshiyagalolunye ngoMvulo odluleyo isithi lokhu yikuncindezela amalungelo abo.
Amalunga eWOZA akhululwe entolongweni ngesibambiso se bail ngolweSine, njalo akhangelelwe ukumiswa phambi komthethwandaba kumaviki amabili azayo.
Embikweni eliwethule ngolweSine, ibandla leMDC lithi kusobala ukuthi amalunga eWOZA abotshelwe ukuthi atshengisele ekhankasela amalungelo athile, agoqela ukuthi usikomitshi omkhulu wamapholisa uMnu. Augustine Chihuri atshiye umsebenzi ngoba ethatha uhlangothi kwezombusazwe.
UMnu. Abednico Bhebhe, umsekeli kamqoqi wenhlelo zalelibandla utshele uSithandekile Mhlanga weStudio 7 ukuthi kufanele abantu betshengisele bekhululekile nxa kukhona abakusolayo.
