Icele le MDC elikhokhelwa nguMnu. Welshman Ncube lithi selisungule isikolo salelibandla esizafundisa abatsha ngembali ye lizwe njalo sibalolonge ukuthi babe ngabakhokheli abalohlonzi.
Abatsha laba bazafundiselwa emahofisini alelibandla, kuqala ngesigaba sako Bulawayo ngenyanga ezayo.
Iziphathamandla zalelibandla ezizafundisa abatsha zigoqela oMnumzana Moses Mzila Ndlovu, Albert Masotsha Ndlovu, Ngqabutho Dube, Qhubani Moyo, Joshua Mhambi, kanye loNkosikazi Rita Ndlovu.
UMnu. Nhlanhla Dube isikhulumi salelibandla uthi uhlelo lwabo lwehlukene kakhulu lolukahulumende olufundiselwa endaweni ze Border Gezi Training Centres ngoba olwabo lulemfundiso enhle.