amalinks wokungena

Breaking News

Icele LeMDC Elikhokhelwa NguMnu. Welshman Ncube Lithi Lilungiselela Ukuxotsha UNkosazana Nomalanga Khumalo Kulelibandla Ngokusemthethweni


Ukuxotshwa kukaNkosazana Khumalo kukhomba ukuthi usezalahlekelwa yisihlalo sakhe seMzingwane ephalamende owasithola engaphansi kwalelibandla, njalo alahlekelwe yisikhundla sokuba ngumsekeli wesikhulumi sedale lephalamende.

Icele le MDC elikhokhelwa nguMnu. Welshman Ncube lithi selixotsha kulelibandla uNkosazana Nomalanga Khumalo omela iMzingwane edale lephalamende ngoba esephumele egcekeni ukuthi usebenzelana lecele le MDC elizithi likhokhelwa nguMnu. Arthur Mutambara.

Ukuxotshwa kukaNkosazana Khumalo kukhomba ukuthi usezalahlekelwa yisihlalo sakhe seMzingwane ephalamende owasithola engaphansi kwalelibandla, njalo alahlekelwe yisikhundla sokuba ngumsekeli wesikhulumi sedale lephalamende.

Isehlakalo esifana lesika Nkosazana Khumalo sehlela oMnu. Njabuliso Mguni, Norman Mpofu, lo Abednico Bhebhe ababemela i Lupane East, Bulilima East, le Nkayi South edale lephalamende ngokulandelana kwabo, besetheswa icala lokuba lobudlelwano lecele le MDC elikhokhelwa nguMnu. Morgan Tsvangirai, abacina bekuvuma.

Isikhulumi salelibandla uMnu. Nhlanhla Dube utshele iStudio 7 ukuthi akukavunyelwana ngokusemthethweni kulelibandla ngokuxotshwa kukaNkosazana Khumalo, kodwa izenzo zakhe zikhomba sobala ukuthi nguye ozixotshe kulelibandla.

Lanxa uNkosazana Khumalo ebikwa esithi usekela abazithi licele le MDC elikhokhelwa nguMnu. Arthur Mutambara, icele elikhokhelwa nguMnu. Welshman Ncube lithi lokhu kungabe kuyikucatsha ngomunwe ngoba esekela icele elikhokhelwa nguMnu. Morgan Tsvangirai.

UMnu. Abednico Bhebhe, umsekeli kamqoqi wenhlelo zecele leMDC elikhokhelwa nguMnu. Morgan Tsvangirai uthi ibandla lakhe lemukela ingqe ngubani ofuna ukumanyana lalo.

IStudio 7 ayenelisanga ukukhuluma loNkosazana Khumalo ngaloludaba.

XS
SM
MD
LG