Icele le MDC elikhokhelwa nguMnu. Morgan Tsvangirai liqalisile ngoMvulo ukuhlolisisa ukusebenza kweziphathamandla zalo kumakhansili wonke elizweni, ngendlela yokubona ukuthi aqhuba umsebenzi ngemfanelo.
Lokhu kwenzakala ibandla leli selimise umsebenzi uMayor wedolobho leMarondera, uMnu. Farai Nyandoro limethesa icala lokungethembeki. Isehlakalo esifana lesikaNyandoro, sehlele omayor ambalwa bamanye amadolobho alelibandla eminyakeni edluleyo.
Ngakwelinye icele, uhulumende uqhuba olwakhe uhlelo lokuhlolisisa ukusebenza kwamakhansili elizweni phansi kweziqondiso zompathintambo zentuthuko yezabelo uMnu Ignatious Chombo.
UMnu. Abednico Bhebhe, umsekeli kamqoqi wenhlelo zalelibandla uchasisela uSithandekile Mhlanga weStudio 7 okunengi ngohlelo lwebandla lakhe.