Iqembu labasekela ibandla leZanu PF ele Chipangano libikwa selithumbe indawo zikamanisipala wedolobho leHarare ezigoqela imikambo, izakhiwo lamagceke okuphakwa khona izimota. Ngomnyaka odluleyo iChipangano yenze ubudlwangudlwanu emkambo we Mupedzanhamo yathatheli bonke abacatshangelwa ukuthi ngabasekeli bebandla leMDC impahla yabo.
Omunye wabaphathintambo bezenzakala elizweni, uNkosikazi Theresa Makone utshele iStudio 7 ukuthi lanxa enguye ongumphathintambo obona ngezamapholisa usehlulekile ukulungisisa udaba lwe Chipangano. UMakone uthi usemelele ukuceba kukhomidi ebona ngokufezwa kwenhlelo zikahulumende womanyano, iJOMIC, ukuthi ibe ngumlamlankunzi.
Kodwa ilunga leJOMIC, uMnu. Qhubani Moyo, owecele leMDC elikhokhelwa nguMnu. Welshman Ncube utshele iStudio 7 ukuthi uzulu ukhanya engananzeleli indlela iJOMIC esebenza ngayo.