Ikomidi yedale lephalamende ebona ngokulotshwa kwesisekelo sombuso kutsha, eye COPAC iqalisile ngoMvulo ukulungisa amaqembu abazahlanganisa imbono yabantu eqoqwe phansi kohlelo lolu olugqitshwe nyakenye, andubana ingene kuma Thematic Committees.
ICOPAC ithi lesi sigaba se Data Uploading sizathatha amaviki amabili, ehoteleni ye Crown Plaza eHarare njalo kuzalandela eminye imicimbi-cimbi kungakayiwa kukhetho lweReferemdum, olukhangelelwe ukuqhutshwa ekupheleni kwenyanga kaMpandula.
UNkosikazi Gladys Dube-Gombami, isiphathamandla se COPAC, utshele uSithandekile Mhlanga we Studio 7 ukuthi amaqembu la aqale ngokukundiswa ngoMvulo umsebenzi lo, njalo ngolweSibili uhlelo lolu luzavulwa ngokusemthethweni nguhulumende.