Ibandla le ZAPU lamuhla lethule umbiko othi lona alisekeli ukuthi ilizwe lidatshulwe phakathi njengalokhu okukhankaselwa yinhlanganiso ye Mthwakazi Liberation Front, iSecession ngoba owalo umbono ngowokuthi isigodlo se Harare kufanele sabele ezinye izigaba amandla, okwaziwa ngokuthi yiDevolution.
Ngaphansi kohlelo lwe Devolution, kufanele kube lezigaba ezinhlanu elizweni ezibalisa i Mashonaland, iMatabeleland, i Midlands, i Manicaland le Masvingo ezizaba lamandla wokuzibusa kodwa zilokhu zingaphansi kwe Zimbabwe.
Kodwa iZAPU ithi abakhankasela uzibuse kaMthwakazi kufanele bevunyelwe ukukhuluma imbono yabo bengahlukuluzwa ngoba kulilungelo labo.
UMnu. George Mkhwananzi, ingcwethi ecubungula ezombusazwe utshele uSithandekile Mhlanga weStudio 7 ukuthi lanxa abantu belombono etshiyeneyo, kusobala ukuthi injongo yabo ngeyo kuthi isigodlo seHarare kungabi yiso sodwa esiphethe amandla..