Umanyano weEuropean Union uthi uzathumela iqula eHarare ngeviki ezayo ukuyakhulumisana lohulumende kanye labenhlanganiso ezizimelayo ngokuvuselwa kobudlelwano phakathi kweEU leZimbabwe.
Embikweni ewethule ngoLwesine, iEuropean Union yazise ukuba ozakhokhela iqula leli nguMnu Nick Westcott, ongumqondisi obona ngobudlelwano bamazwe akulumanyano laweAfrica.
Iqula leli lizafika eHarare ngoLwesibili njalo lizahlala okwamalanga amabili andubana lidlulele eSouth Africa ukuyaphatheka emhlanganweni weEU-South Africa Summit.
Udaba lwezijeziso ezafakelwa uMongameli Mugabe leziphathamandla zeZanu PF yiEU lukhangelelwe ukuhluzwa emihlanganweni leziphathamandla zikahulumende.
Ingcwethi kwezombusazwe uMnu Rejoice Ngwenya utshele uNtungamili Nkomo weStudio 7 ukuthi udlakela olubekhona kuliviki eHarare lulakho ukuphazamisa ukuvuselelwa kobudlelwano beZimbabwe leEU.
