Inhloko kahulumende uMnu Morgan Tsvangirai sesole inkampani yeNestle ngokuvala ifekithali yayo eZimbabwe esithi iphangise ukuginya ingakahlafuni.
Inkampani le yazise ngolweSithathu ukuthi sivala ifekithali yayo kulandela ukuhlukuluzwa kweziphathamandla zayo ngamalunga eZanu PF athi uMnu Joseph Made umphathintambo obona ngezokulima, lobona ngenhlelo zabatsha uMnu Savior Kasukuwere.
Ababili laba babikwa beye emawofisini alinkampani ngeviki edluleyo bayahlasela iziphathamandla zayo besithi kungani zisala ukuthenga uchago oluvela epulazini likaNkosikazi Grace Mugabe iGushungo Daily Estate.
I Nestle iqume ubudlelano bayo lepulazi likaNkosikazi Mugabe ngoMfumfu kulandela ukubandezelwa kwayo ngabalwela ilungelo loluntu emhlabeni jikelele ukuthi yekele ukuthenga uchago oluvela kuleli pulazi, elibikwa lithathelwe omunye umlimi omhlophe yimuli kaMugabe eminyakeli edluleyo.
Ekhuluma lentathelizindaba eHarare uTsvangirai uthe bekungadingeki ukuthi iNestle izivale ifekithali yayo wathi njalo obekudingeka yikuthi ikhulumisane lohulumende kulungisiswa okuhluphayo.
Ngalokhu uMnu Tsvangirai uthi inkampani le iginye ingakahlafuni. La ngamazwi asekela yingcwethi ecubungula ezombusazwe uMnu Brilliant Mhlanga kungxoxo ayenze loNtungamili Nkomo weStudio.
