Amahofisi ekhansili ye Harare abikwa etshone evaliwe ngolweSithathu ngoba izisebenzi zisithi zesaba ukuhlaselwa ngabacatshangelwa ukuthi ngabasekeli bebandla le ZANU PF, ngemva kokuthola udletshana lokuthi bazatshengisela kulikhansili besola uluhlu lokusetshenziswa kwemali olwe Budget oluhlelwe yile ikhansili besithi alunanzi abampofu.
Umsekeli ka Mayor walelidolobho, uMnu. Emmanuel Chiroto, utshele iStudio 7 ukuthi yena kanye lamanye amakhansila bebesebenzela phandle okulakho ukwenza ukuthi abantu balahlekelwa kakhulu ngalesisehlakalo.
Amapholisa ahlomileyo abikwa etshone ebhoda-bhoda emahofisi ekhansili la, wona ake ahlaselwa kumaviki amabili edluleyo ngabakade besola ukugecwa kwezilimo zabo yikhansili.
Kusenjalo, kulandela udlakela oluqhamuke eMbare kuthange, icele le MDC elikhokhelwa nguMnu. Morgan Tsvangirai lithi udlakela lolu luqondiswe kumalunga alo, ikakhulu emizini ye Mbare, Budiriro, kanye le Epworth.
UMnu. Ivis Ndlovu, isiphathamandla salelibandla ongomunye wababotshiwe eMbare njalo uthi ucatshise ikhanda e Harvest House ngemva kokubaleka emzini wakhe eMbare. Ekuxoxeni kwakhe loSithandekile Mhlanga we Studio 7 uNldovu uthi uvakatshele abalokhu bebotshiwe labalimeleyo esibhedlela kulandela loludlakela.