Umphathintambo wenhlelo zamanzi uMnu. Sam Siphepha Nkomo uthi uhlelo lokudonsa amanzi edamu leMtshabezi esiya kumadamu eBulawayo, iMtshabezi Water Project- solusemaphethelweni njalo kungenzeka ukuthi idolobho lako Bulawayo liwasebenzise lamanzi kungakapheli womalo umnyaka.
Lanxa uhlelo lwe Matabeleland Zambezi Water Project kuyilo olukhangelelwe ukuthi lungaqeda uhlupho lokuswelakala kwamanzi eMatabeleland lakoBulawayo, uhlelo lweMtshabezi Water Project luqakathekiswa ngoba luzancedisana lamadamu abalisa insiza, uMzingwane, Upper Ncema, Lower Ncema , le Nyankuni alamanzi amalutshwana sikhuluma-nje.
Ukhansila Martin Moyo, olilunga lekhomithi ebona ngenhlelo zamanzi kukhansili yakoBulawayo utshele uSithandekile Mhlanga we Studio 7 ukuthi bazibonele ngawabo ukuthi uhlelo lweMtshabezi Water Project solusemaphethelweni.