Indlela yokhetho ikhanya ivuthwa ngamandla kulandela ukuvumelana phakathi kwamabandla akuhulumende womanyano ekuthini inguquko ephathelane lezokhetho kumele ilandelwe nini ibe ngumthetho.
Abamela iZanu PF leMDC bagqibe lumhlahlandlela ngoLwesithathu balobelana phansi ukuthi ekuqaliseni kwenyanga ezayo, inguquko yeElectoral Ammendment Bill kumele ifakwe ibe ngumthetho kungakedluli amalanga angamatshumi amane lanhlanu, 45.
Bavumelene njalo ukuthi ukufundiswa kukazulu mayelana lokuvota kumele kuqale kungakedluli inyanga, kanti njalo uluhlu lweVoters roll kumele luhlelwe kakutsha kungakedluli amalanga angamatshumi amane lanhlanu kuqala ngenyanga ezayo.
Kodwa udaba olulokhe luhlupha ngolwesicelo seMDC ekhokhelwa nguMnu Welshman Ncube olokuthi uMnu Arthur Mutambara angaze ananzwa njengomkhokheli walelibandla njengoba sowaxotshwa kulo.
Olunye udaba oluhluphayo ngolokuguqulwa kwendlela abezomvikela abasebenza ngayo lokuthi ukhetho kumele luqhutshwe nini.
IStudio 7 ixhume umeli weMDC ekhokhelwa nguMnu Welshman Ncube kunkulumo uMnu Moses Mzila Ndlovu sambuza ukuthi kungani bengaluphathanga udaba lokuthi ukhetho kumele luqhutshwe nini.
