Amapholisa eMutare avimbe ikhomithi yedale lephalamende ebona ngezokwenjiwa ukwenza imihlangano lozulu.
Imihlangano le ibingeyokuthapha imibono yezakhamizi zedolobho leli mayelana lokwenzakala emigodini yamadayimani eChiadzwa . Ilunga lalikhomithi uMnumzana Moses Mare utshele iStudio 7 ukuthi okunye okwenze bengaphikisani lesinqumo samapholisa yikuthi besebehluleke ukuqala bayekhulumisana lozulu weChiadzwa besizwa izikhalazo zakhe ngoba bevinjiwe njalo ukuyakhona izolo ngamapholisa losibalukhulu wesigaba seManicaland.
UMare uthe ikhomithi le isizakuba lomhlangano ngomvulo eHarare ukuze kuqoqwe kakutsha uhambo lwako Chiadzwa wathi umsekeli kanobhala wephalamende uphakathi kokulungisisa ingwalo ezizavumela ikhomithi le ukuyafika koChiadzwa.
Kubikwa izinto zingamanga kuhle emigodini yeMarange le sokuvumbuluka njalo udaba lokuhlukuluzwa kwezakhamizi ngamapholisa lamasotsha. Kulembiko njalo ethi izakhamizi zako Chiadzwa zibhekane lokususwa kulindawo nguhulumende zisiyahlaliswa kutsha kweyine indawo ese Odzi engaphansi kwe ARDA.
Ukuzwe sizwe okunye okungabe kusesanzaka koChiadzwa sixhume uMnumzana Boniface Gweru othi ulabantu abanengi abaziyo abahlala koChiadzwa abamtshela ngokunengi okwenzakala khonale..
Silokhu sikudaba olufanayo sokukhanya angani udaba lwelitshe eliligugu ledayuimani yako Chiadzwa solwenze kwabakhona ukutshaya amanz'amnyama njengoba kungasakhanyi ukuthi umaqhuzu ngubani phakathi kwekhomithi yedale lephalamende ebona ngezokwenjiwa lamapholisa.
Ukuhlaziya loludaba u Gibbs Dube weStudio 7 uxhume umnumzana Japhet Ndabeni Ncube olilunga le Human Rights Commission endawonye legqwetha uMnumzana Job Sibanda.
