Ingxabangxoza ikhanya ilokhe iqhubeka edabeni lokwenjiwa kwama diamonds, ikhomidi yephalamende ebona ngezokwenjiwa isilungiselela ukuyahlaziya okwenzakalayo emigodini le ngeviki ezayo.
Ikhomidi le ivinjwe ngamapholisa edolobho leMutare encedisana lomphathintambo obona ngomsebenzi wezenjiwa yo uMnumzana Obert Mpofu ukwethekelela lindawo ngeviki edluleyo.
Ngasikhathi sinye isiphathamandla seKimberly process esikhangele ukwenjiwa kwamadiamonds eChiadzwa uMnumzana Abby Chikane wethule umbiko othi kulezandla ezinengi kakhulu koChiadzwa okubangela ukuthi kucine kuphekwa imboza.
NgolweSibili besokuphuma imibiko njalo yokuthi uhulumende uthi uzathengisela ezinye iziqinti zako Chiadzwa kwabamankampani ezokwemba, aselobe ingwalo eziveza ukuthi athakazelela ukuqhuba lumsebenzi.
Ababona ngokulondolozwa kwelungelo loluntu baqhubeka besethula imibiko yokuhlukuluzwa kwabantu endaweni le.
Ukuhlaziya udaba lokuthi ikhomidi yephalamende ebona ngezokwenjiwa isiqoqa njalo olunye uhambo lokuya koMarange, lokuthi kambe loluhambo luzaphuma lani, uBrenda Moyo weStudio 7 uxhume ingcwethi kwezenotho uMnumzana Simon Lusinga, othi ikhomidi le kumele iveze kuzulu ububi bonke obenzakala koChiadzwa.
