Amapholisa alele ikhomidhi eboona ngezenjiwayo edale lephalamende ukuya koChiadzwa esithi kufuneka incwadi evela kusikomitshi wamapholisa uMnumzana Augustine Chihuri, laye ophinde wadlulisela ikhomithi le kumphathintambo obona ngezokwenjiwa uMnumzana Obert Mpofu laye owehluleke ukuphathisa likhomithi.
Usibalukhulu uMushowe ubikwa elobele ikhomithi le incwadi esithi amalunga ekhomithi le abefuna ukuyantshontsha amadayimani wona abikwa etholakala indawana yonke nje.
IStudio 7 ikhulume lomunye wamalunga ekhomithi le uMnumzana Moses Mare othe ikhomithi le ihle yavinjwa khona ukungena emahofisini eyinye inkampani eyemba amadayimane koChiadzwa eye Canadile mining izolo.
UMare uthe ikhomithi yakhe ilokudana ngalesisehlakalo njalo akwazakali ukuthi isizakuya nini koChiadzwa njengoba iphalamende ivalile okwenyanga ezintathu. Umphathintambo wezokwenjiwa uMnumzana Obert Mpofu walile ukukhuluma leStudio 7 ngaloludaba.
UBrenda Moyo oweStudio 7 ukhulume losomabhizimusi wako Bulawayo uMnumzana Michael Bathandi Mpofu othi isehlakalo lesi silihlazo.
UBrenda uphinde waxhuma ingcwethi ecubungula ezombusazwe uMnumzana Mqondobanzi Magonya othi ukuvinjwa kwekhomithi yedale lephalamende ukuya koChiadzwa kuveza sobala ukuthi kukhona okufihlwayo.
