Ikomidi ekhokhela uhlelo lokulotshwa kwesisekelo sombuso esitsha ihlangene ngoLwesithathu eHarare isamukela imbiko evela ezigabeni zonke zelizwe mayelana lohlelo lolu, yahlaziya njalo inkinga ezibikwa zixaka loluhlelo.
Omunye wabagcinisihlalo balikomidi uMnu Edward Mkhosi utshele iStudio 7 ukuthi imbiko abayitholileyo iveza ukuthi uhlelo lolu luhamba kuhle. Uthi njalo ikomidi yakhe yenza konke okusemandleni ayo ukulungisisa okuhluphayo okugoqela udaba lweholo lalabo abaqhuba loluhlelo kanye lembiko yokwethuselwa kukazulu.
Uhlelo lolu luqhubeka nje, inhlanganiso yeAmnesty International sixwayise ukuthi kulakho ukuqhamuka udlakela elizweni nxa ukwethuselwa kukazulu kungaqhubeka.
Inhlanganiso le isole kakhulu ukuthunjwa kanye lokutshaywa kwamalunga ekade ebona ngokuqhutshwa kwaloluhlelo ezimele ngeviki edluleyo eMashonaland.
AbeZanu PF babikwa beyibo abethusela uzulu. Kodwa isiphathamandla seZanu PF uMnu Absolom Sikhosana ukulandule ukuthi amalunga ebandla lakhe ethusela uzulu phezu kohlelo lolu.
