Inhloko kahulumende uMnumzana Morgan Tsvangirai uqonqosele ukuthi eleZimbabwe alingeke laba lokhetho kungakabi lesisekelo sobuso esitsha.
Ekhuluma lentathelizindaba eBrussels kwele Belgium ngoMvulo uTsvangirai uthe ilizwe lifuna inguquko ethize anduba kube lokhetho olukhululekileyo lempumela ezasuthisa umuntu wonke.
UTsvangirai ubese Brussels lapho akade engumhlonitshwa emhlanganweni wamazwe awezwekazi le Europe othiwa European Development Days. Ukhulume njalo ngodaba lokuthi uhulumende womanyano kalungelanga ele Côte d'ivoire ngemva kokhetho olwenziwe kulelolizwe olulokhe lungakabi lokuvumelana kulabo abancintisane kilo, ukuthi ngubani onqobileyo.
UBrenda Moyo weStudio 7 ukhulume lomsekeli wesikhulumi seMDC ekhokelwa nguTsvangirai uNkosazana Thabitha Khumalo othi kusese kunengi okumele kulungisiswe elizweni andubana ilizwe libe lokhetho olukhululekileyo.
Silokhe sikudaba lokhetho inhlanganiso yezisebenzi eyeZimbabwe Congress of Trade Unions –ZCTU ikhuthaza ukuthi nxa kuzakwenziwa ukhetho elizweni kakwenziwe olukamongameli kuphela ngoba yilo olwaletha ukungazwisisani phakathi kwe MDC le ZANU PF.Ithi impumela yokhetho lwamalunga edale lephalamende leSenate yasuthisa uzulu.
UBrenda Moyo ukhulume lomsekeli kanobhala jikelele weZCTU uMnumzana Japhet Moyo othi uzulu weZimbabwe kumele aqunge isibindi alungele ukungena kukhetho.
Kusenjalo, ikomidi yedale lephalamende ebona ngokulotshwa kutsha kwesisekelo sombuso eye COPAC, ithi kusobala ukuthi ukhetho lungaqhutshwa ngomnyaka ozayo, uhlelo lokulotshwa kwesisekelo sombuso esitsha luyabe lungakagqitshwa, okuzabangela ukuthi kungabi lokhetho olukhululekileyo.
Isiphathamandla salikomiti, uNkosikazi Gladys Dube-Gombami utshele uSithandekile Mhlanga weStudio 7 ukuthi iCOPAC ilesikwelede esifika izigidi eziyisithupha, njalo abasebenza phansi kwaloluhlelo abasoze babuyele emsebenzini uhulumende engakababhadali imali-le.
