Isigaba seMashonaland East yiso esilamalunga eZanu PF amanengi abikwa ephatheke kundaba zokuhlukuluzwa kwabasekeli beMDC kusukela ngokhetho luka2008 kuze kube namuhla.
Lokhu kuphume kugwalo olwethulwe yiMDC ekhokhelwa nguMnu Morgan Tsvangirai inhloko kahulumende.
Ibandla leli lithi ukudingisisa elikwenzileyo kuveze ukuthi, kuse Mashonaland East okuhlukuluzwa khona abasekeli balo kakhulu ngabeZanu PF, ilandelwa yiManicaland, kuze iMashonaland Central, leMashonaland West.
I MDC ithi eMatabeleland North leSouth bambalwa abasekeli beZanu PF abahlukuluza abalembono ephikisana leyabo.
Imbiko le iza ngesikhathi kulokufuthelana okukhulu elizweni phakathi kweZanu PF leMDC ngodaba lokulotshwa kwesisekelo sombuso esitsha, iMDC isethesa iZanu PF umlandu wokwethusela uzulu ukuba engaphatheki kuloluhlelo.
Umsekeli wesikhulumeli seMDC kaTsvangirai uNkosazana Thabitha Khumalo utshele uNtungamili Nkomo owe Studio 7 ukuthi ibandla lakhe likhathazeke kakhulu ngodlakela lweZanu PF, okuyinto elandulwe nguMnu Absolom Sikhosana, isiphathamandla seZanu PF.
