Ibandla leZanu PF selilandule imbiko yokuthi uMongameli Mugabe ugulela ukufa kwesinye isibhedlela eSingapore.
Imbiko le ikhitshwe ngelinye iphephandaba leZimbabwe elidinda ebulenjini, yathi ngokudojwa zinthathelizindaba zakwamanye amazwe, yamemetheka okomlilo wendle.
UMugabe ulubhekise kweleSingapore ngenyanga edluleyo, njalo isikhulumeli sakhe uMnu George Charamba uthi ubelanda ukuyadingela indodakazi yakhe indawo yesikolo.
Kodwa iphephandaba leli liveze ukuthi uMongameli Mugabe ubelaliswe kwesinye isibhedlela egulela ukufa njalo ubeselwatshwa.
Le yimbiko elandulwe ngumphathinatmbo obona ngokwethulwa kwemibiko uMnu Webster Shamu.
Isikhulumeli seZanu PF uMnu Rugare Gumbo laye uyilandule esithi uMugabe uziphilele njalo uzaphenduka ilanga langoLwesine lingakafiki, lapho azakhokhela khona umhlangano we-cabinet.
Ukuhlaziya loludaba sixhume ingcwethi ecubungula ezombusazwe uMnu Effie Dlela Ncube yena othi uzulu kumele aziswe ngempilakahle kaMugabe ingabi yimfihlo.
