Icele le MDC elikhokhelwa nguMnu. Welshman Ncube lithi selimangalele owayengumkhokheli walelibandla, uMnu. Arthur Mutambara ngokuhlala emhlanganweni yenkokheli yamabandla akuhulumende womanyano, esephula isinqumo somthethwandaba esokuthi engaqhubi umsebenzi emele lelibandla kuze kulungiswe udaba lokubangwa kwezikhundla.
UMutambara uyasiphikisa isinqumo somthethwandaba.
IMDC ithi imangalele loMongameli Robert Mugabe kanye lenhloko kahulumende uMnu. Morgan Tsvangirai ngokudelela umthethwandaba ngoba beqhuba imihlangano le ndawonye lo Mnu. Mutambara.
Iziphathamandla zalelibandla zithi uMnu. Ncube nguye oxwayisa igqwetha uMnu. Josphat Tshuma ukuthi aqhubeke njani ngaloludaba. UTshuma utshele iStudio 7 ukuthi ubengakaziswa ngaloludaba ngoba engekho ehofisini yakhe ko Bulawayo.
UMnu. Edwin Ndlovu, isiphathamandla salelibandla, utshele uSithandekile Mhlanga we Studio 7 ukuthi kusobala ukuthi uMongameli Robert Mugabe uzikhethela ukusebenza loMnu. Mutambara.