Icele leMDC elikhokhelwa nguMnu Morgan Tsvangirai seligcizelele ukuthi akulakhetho olumele lwenziwe lonyaka kungakalungisiswa okutshiyeneyo okugoqela ukulotshwa kwesisekelo sombuso esitsha, uluhlu lwabantu abalelungelo lokuvota lokunye okutshiyeneyo.
Emhlanganweni weNational Council eliwenze ngoLwesine, lelibandla lithe njalo kungakayiwa kukhetho, kumele kuguqulwe imithetho evimba umbuso okhululekileyo, kusungulwe amadale akhangelane lezodlakela njalo inhlanganiso zezindaba ezifuna ukusakaza zinikwe imvumo.
IMDC ikhuthaze njalo iSadc ukuthi ithumele iqula layo leSadc Troika njengokutsho kwayo nyakenye ukuthi lizesebenzelana leJomic.
Amanye amabandla agoqela iZapu leMavambo lawo athi abambene lamacele womabili eMDC ekuthini kuqale kulungisiswe okutshiyeneyo kungakayiwa kukhetho.
Isikhulumeli seMDC kaTsvangirai, uNkosazana Thabitha Khumalo utshele lumsakazo ukuthi ibandla lakhe alisoze livume kusenziwa ukhetho izikhalazo zalo zingalungisiswanga.
