Icele le MDC elikhokhelwa nguMnu. Morgan Tsvangirai lithi ukulwa okubikwa kuphakathi kwalelibandla kuyinto encinyane kakhulu, nxa kuqathaniswa lomsebenzi omkhulu abawenzayo, owokulungisela ukulotshwa kutsha kwesisekelo sombuso , kanye lokhetho oluzayo.
Lokhu kulandela umhlangano owenziwe yilelibandla ngeSonto, lapho uTsvangirai atshele intathelizindaba ukuthi ibandla lakhe selibophe izinqumo ezithile, ezigoqela ukuxotsha amanye amalunga alo abangela udlakela kulelibandla.
UMnu. Obert Ncube, isiphathamandla saleli bandla esigabeni se nkabazwe, utshele uSithandekile Mhlanga we Studio 7 ukuthi umsekeli kaTsvangirai, uNkosazana Thokozani Khuphe, ubekhuluma emhlanganweni e Gweru le Shurugwi ngempelaviki ngodaba lokulungiselela ukhetho oluzayo , kanye lokulotshwa kutsha kwesisekelo sombuso.