Uhulumende weMelika seqhelise ngomnyaka izijeziso azethulela uMongameli Robert Mugabe labanye bakhe bebandla leZanu PF.
Embikweni awethule ngoMvulo ntambama, uMongameli Barack Obama wazise ukuthi uhulumende wakhe uthethe isinqumo lesi ngoba kungela nguquko eqotho esibe khona kwezombusazwe kweleZimbabwe.
Inyathelo leMelika leli liza ngemva kwamaviki amabili umanyano wamazwe aseEurope lawo uqhelise izijeziso zawo usithi kumele iZanu PF igcwalise isivumelwano seGlobal Political Agreement nxa ifuna zesulwe.
Inhloko kahulumende uMnumzana Morgan Tsvangirai yena ucele amazwe angentshonalanga ngoMvulo ukuthi esule zonke izijeziso.
Isiphathamandla seZanu PF uMnumzana Richard Ndlovu usole ukuqheliswa kwezijeziso lokhu yiMelika esithi kumele zesulwe. IMelika ifakele uMugabe labanye bakhe izijeziso ngomnyaka ka2003 imethesa umlandu wokwephula ilungelo loluntu.
Ukuhlaziya udaba lwezijeziso lolu, uNtungamili Nkomo weStudio 7 uxhume umkhokheli wenhlanganiso yeAssociation of Zimbabweans Based Abroad uMnumzana Dumaphi Mema yena othi ukuze izijeziso zesulwe kumele iZanu PF iguqule izenzo zayo.
