Abameli beZanu PF lamacele womabili eMDC kunkulumo zokuxazulula okuhluphayo kuhulumende womanyano baphume logwalo lwempumela yenkulumo zabo ngoLwesihlanu.
Ugwalo lolu luveza ukuthi abakhulumisanayo sebeyehlulekile ukuvumelana entweni ezitshiyeneyo ezihluphayo, ezigoqela udaba lukasibalukhulu webhanga elikhulu lelizwe uMnu Gideon Gono lomtshutshisi kahulumende omkhulu uMnu Johannes Tomana.
Ugwalo lolu yilo oluzahanjiswa kuMongameli Jacob Zuma weleSouth Africa, yena ongumlamulankunzi kudaba lweZimbabwe. UMnu Zuma ubemele anikezwe ugwalo lolu ngoLwesithathu kodwa kwehlule ngenxa yokudonselana okuqhubekayo phakathi kweZanu PF leMDC.
Abakhulumisanayo babikwa besithi inkokheli yamabandla abo yiyo esimele ikhulumisane ngokuhluphayo ngoba bona sebeyehlulekile ukuzixazulula ingxaki ezikhona. UMnu Morgan Tsvangirai, okhokhela elinye lamacele eMDC wethule umbiko esola kakhulu iZanu PF ngokwala ukuthi kugcwalisiswe zonke izibopho zesivumelwano seGlobal Political Agreement.
