Iqhubekela phambili ingxabangxoza phakathi kwenhloko kahulumende uMnu. Morgan Tsvangirai lemuli kaNkosazana Locadia Karimatsenga Tembo obikwa wamvelela ngomthetho wesintu. Imuli yako Tembo igcizelela ukuthi indodakazi yabo ilokhu ingumka Tsvangirai njalo isemendweni kwabozala eBuhera.
Isikhulumi semuli yako Tembo uMnu. Simba Karimatsenga utshele iphephandaba le The Herald ngolweSihlanu ukuthi imuli yakhe kayazi lutho ngombiko owethulwe nguMnu. Morgan Tsvangirai kumaphephandaba esala indodakazi yabo.
Kodwa isikhulumi sikaTsvangirai uMnu. Luke Tamborinyoka utshele iStudio 7 ukuthi uTsvangirai uselugqibile loludaba njalo kasoze akhulume ngalo futhi kumbe abuyele emuva njalo imuli yako Tembo iyakwazi lokhu.
Kumaviki edluleyo, uTsvangirai ubephikisa ukuthi uye wayavela ukuthi uNkosazana Tembo abe ngumkakhe, kodwa wethule umbiko ekuqaliseni kwaliviki esithi ngempela wathumela iqula emzini wakoTembo wakhupha inhlawulo ezithile esetshelwe ukuthi uzithwele uMaMtembo, kodwa kasamthathi ngezizatho ezitshiyeneyo ezigoqela ukuthi imuli le ingabe isebenzelana labezombusazwe ukubhidliza isimo sakhe.
USithandekile Mhlanga weStudio 7 uxoxe loMnu. Zidekalanga Khumalo ingcwethi ecubungula ezombusazwe ukuze sihlafune loludaba.