Inhlanganiso ye World Health Organisation- WHO ibika ukuthi umkhuhlane wendingindi usubulele abantwana abedlula ikhulu – 110, kusukela ngenyanga ka Mpandula nyakenye.
I WHO ibika njalo ukuthi umkhuhlane lo usuhlasele abantu phose inkulungwane lenxenye -1482.
Kodwa umphathintambo obona ngezempilakahle uMnumzana Henry Madzorera uthi kavumelani lenani elethulwa yi WHO labantu asebebulewe ngumkhuhlane lo esithi ngokwazi khakhe inani leli lingaphansi kwekhulu.
UMadzorera uthi ugatsha lwakhe luzimisele ukulwisana lokumemetheka kwawo elizweni lonke jikelele.
Umkhuhlane lo ubikwa uhlasele kakhulu abantwana babazali bokholo lwesipositoli bona abangavumelani lokwelatshwa, njalo bengahlabisi abantwababo amajekiseni okuvikela imikhuhlane. Ngalokhuke uhulumende usezama ukwethula umthetho ozabamba ngamandla wonke umuntu ukuhlabisa abantwana.
UBrenda Moyo owe Studio 7 ukhulume lodokotela Joshua Sibanda othi umkhuhlane wendingindi uyelapheka nxa ungaphangiselwa, njalo ulakho ukudala umonakalo omkhulu emzimbeni womuntu, okungenza acine elahlekelwa ngumpefumulo nxa ungaphuzelwa.
