Umhlangano omkhulu we conference oweZANU PF osanda kugqitshwa koBulawayo uphume lezinqumo ezithile, ezigoqela ukuthi uhulumende womanyano kumele afike komlindi uyacina, ngoba ebuyisela umsebenzi walelibandla emuva.
Esethula lezi zinqumo, isiphathamandla salelibandla uMnu. Emmerson Mnangagwa uthe umphathintambo wezemali uMnu. Tendai Biti, owebandla le MDC elikhokhelwa nguMnu. Morgan Tsvangirai kabeli imali eneleyo kubaphathintambo bakahulumende abakubandla le ZANU PF ukuthi beqhube inhlelo ezigoqela okuphathelane lokwethulwa kwembiko, ukulungiswa kwemigwaqo lenjanji, kanye lezokulima.
UMnangagwa uphinde wathi kufanele kusetshenziswe imali edabuka elizweni ndawonye leyakwamanye amazwe, njalo kuqiniswe ubudlelwano bezimbabwe lamazwe asempumalanga, agoqela ele China.
Ibandla leli liphinde lasola eleMelika leleBhilithane ngokusekela izitabane kanye lokuncindezela amazwe angasekelani lombono wabo.
UMnu. Rugare Gumbo isikhulumi sebandla leZANU PF uthi abantu abazizwisisi isinqumo zebandla lakhe.
Kusenjalo, uMnu. Methuseli Moyo, isikhulumi sebandla le ZAPU utshele uSithandekile Mhlanga weStudio 7 ukuthi ibandla lakhe liyazisola izinqumo zebandla le ZANU PF ngoba kazakhi isizwe.