Inengi labalwela amalungelo oluntu liyakhonona ngohlelo lukahulumende olwe National Youth Service, lisithi uhlelo lolu lufundisa abatsha ukukhankasela ibandla le ZANU PF besebenzisa udlakela, ngakho kumele banikwe imfundiso enhle kakutsha.
Abatsha laba, abaziwa ngokuthi ngama “green bomber” babikwa sebeqalisile ukukhankasela ibandla le ZANU PF kwezinye izigaba zelizwe ngohlukuluza abantu.
USithandekile Mhlanga we Studio 7 uxoxe lo Mnu. Qhubani Moyo, umabhalane wabatsha kubandla le MDC elikhokhelwa nguMnu. Arthur Mutambara, endawonye lo Mnu. Mmeli Dube umqoqi wenhlelo kunhlanganiso elwela amalungelo abatsha, eye National Youth Development Trust, ukuze sizwe imbono yabo ngaloludaba.
U Moyo usungule ingxoxo ngokuthi uhlelo lwe National Youth Service luqakathekile nxa lwenziwe ngemfanelo, ngakho okubi yikuthi ibandla le ZANU PF selingcolise loluhlelo ngoba lisebenzisa intsha le ukuthi ikhankasele lelibandla isebenzisa udlakela.