Umgcinisihlalo wenhlanganiso yeZimbabwe Media Commission uMnu. Godfrey Majonga usencome uMnu. Tafataona Mahoso owayengumgcinisihlalo we Media and Information Council eyayisolwa ngabanengi ngokunyathela amalungelo entathelizindaba lamaphephandaba azimeleyo.
UMajongwe ukhulume amazwi la ngemva komhlangano lentathelizindaba koBulawayo ngempelavi, lapho agcizelele ukuthi inhlanganiso yakhe isebenza kuhle loMnu. Mahoso, yena oseyisiphathamandla seBoard yalinhlanganiso.
Lokhu kwenzakala inhlanganiso ebona ngokwethulwa kwembiko emhlabeni jikelele eye International Federation of Journalists for Human Rights isithi amankampani azimeleyo ethula imbiko elizweni awakhululekanga ngenxa yokuhlukuluzwa nguhulumende.
Inhlanganiso ezilwela amalungelo entathelizindaba elizweni ezigoqela sezisole kakhulu amazwi kaMajonga zisithi kusobala ukuthi inhlanganiso yakhe ayisoze ihluke kakhulu leyayikhokhelwa nguMahoso.
UMnu. Roderick Fayayo, isiphathamandla senhlanganiso ebona ngamalungelo ezakhamizi eye Bulawayo Progressive Residents Association utshele uSithandekile Mhlanga we Studio 7 ukuthi izakhamizi lokhu zingatholi indaba ezizifunayo nxa zithenga amaphephandaba kahulumende.