Ibandla leZanu PF selilandule imbiko ethi uMongameli Mugabe uzakhetha umphathintambo wezomvikela uMnu Emmerson Mnangagwa ukuthi athathe intambo zombuso nxa ethe wanqoba kukhetho oluzayo.
Iphephandaba lakweleSouth Africa, iSunday Times lithi uMugabe ukhangelele ukunqoba kukhetho oluzayo lapho azanikeza khona uMnangagwa intambo zombuso yena atshiye umsebenzi.
Iphephandaba leli lithi uMugabe uzakwenza lokhu ngenjongo yokuzivikela ekubotshweni okulakho ukumehlela nxa intambo zombuso zingawela ezandleni zomuntu ongela budlelwano obuhle laye.
Isisekelo sombuso esikhona okwamanje sithi nxa umongameli ethe watshiya isikhundla isikhathi sakhe singakeneli, idale lephalamende yilo elimele likhethe ozaphatha intambo kusalungiselelwa ukhetho.
Ingcwethi zithi nxa imbiko le iliqiniso, uMongameli Mugabe engafeza isifiso sakhe nxa ibandla lakhe lithe lanqoba ngesilinganiso esiphezulu kukhetho lokudinga amalunga edale lephalamende.
Kodwa isikhulumeli seZanu PF uMnu Rugare Gumbo uyilandule imbiko yeSunday Times.
