Amalunga ebandla leZANU PF avelela ezigabeni ezitshiyeneyo zelizwe, kanye lezethekeli ezinxusiweyo ezivela kwamanye amazwe abikwa elokhu etheleka eHarare phambilini komhlangano omkhulu walelibandla oweCongress okhangelelwe ukuqalisa ngolweSine.
UMnumzana Jorum Gumbo, ilunga le Politburo yalelibandla, utshele iStudio 7 ukuthi amalunga aleli dale abe phakathi komhlangano ngolweSithathu ntambama, owokulungiselela i Congress, wona obulokhu usaqhubeka sisiya emoyeni.
Izikhundla ezikhangelelwe ukuvunyelanwa ku Congress ngezokuthi uMongameli Robert Mugabe aqhubeke enguye okhokhela lelibandla, uNkosikazi Joyce Mujuru aqhubeke emsekela, lokuthi esikamngcinisihlalo walelibandla, kanye lesika muyi uMnu. Joseph Msika, esokuba ngumsekeli wesibili ka mongameli zingaphathwa na nguMnu. Simon Khaya Moyo lo Mnu. John Nkomo ngokulandelana kwabo.
USithandekile Mhlanga we Studio 7 uxoxe lo Mnu. Bekithemba Mhlanga ingcwethi ecubungula ezombusazwe ukuze sizwe imbono yakhe ngaloludaba.