Kulemuli yeMatopo eqede phose iviki ivalelwe esitokisini isetheswa icala lokweyisa induna yakulowomango ngemva kokuba yale ukuhlawula isigwebo secala lokuloya.
Okhuluma emele limuli uMnu Anele Dube, ongomunye wababotshwe ngeSonto bakhululwa ngoLwesine, uthi induna uMalaki Masuku utshele uyise omdala, uMnu Shadreck Dube ukuthi uyaloya ngakho kumele ahlawule inkomo.
UDube uthi luqale kanje loludaba: Abongikazi beNathisa Clinic bakhonone ngokuthi kulemikhoba elala ibamunya amabele.
Kusuka lapho induna ibize inyanga ukuzekhipa limikhoba. Ithe ifika ekiliniki yasisithi imikhoba ibalekile yaya emzini kaDube, yena ongusobhuku.
Yalubhekisa koDube ke linyanga ingasadlanga nkotshana, yafika khonale yakhipha okuyisandla okwenziwe nge-rubber kugqize amangqongqo, yathi yiwo umkhoba obuhlupha abongikazi.
Yathi njalo inyanga, umkhoba lo ngokaDube, okwenze induna yathi kumele ahlawule inkomo.
Kodwa ngeSonto imuli kaDube ihlangane lenduna iyazisa ukuthi leyo nkomo ayisoze iyihlawule ngoba uShadreck Dube engaloyi njalo into eyakhitshwayo ingayisiyo yakhe.
Yasuka ke kulowomhlangano imuli yaDube kulokufuthelana okukhulu lenduna, kwathi sokuntambama abakoDube babona ngamapholisa esezobabopha ngecala lokweyisa induna.
Kwabotshwa abakoDube abayisikhombisa njalo bavalelwa kusukela ngeSonto bazohanjiswa emthethwandaba weKezi ngoLwesine lapho okufike kwathiwa babuye mhlaka 10 ngenyanga ezayo, basebekhululwa ke.
UMnu Anele Dube utshele iStudio 7 ukuthi icala eletheswa uyisemdala lingamanga, wathi ngalokho abasoze bavume ukuyihlawula inkomo efunwa yinduna.
Phansi komthetho weWitchcraft Suppression Act, kulicala ukuthi umuntu enze imisebenzi yobuthakathi.
Kodwa lanxa kunjalo, induna yenza iphutha ngokuhlawulisa uDube ngoba ingelawo amandla okuthonisa icala elinje, kutsho igqwetha uMnu Matshobana Ncube.
