Iinengi lenhlanganiso ezizimeleyo zitshengisa ukuthi zilakho ukwamukela ugwalo olukhangelelwe ukuthi lube yisisekelo sombuso esitsha olweDraft Constitution.
Ukudingisiswa okwenziwe yiStudio 7 kuveze ukuthi inhlanganiso ezigoqela i Bulawayo Progressive Residents Association, icele lenhlanganiso yezisebenzi ele ZCTU elikhokhelwa nguMnu. George Nkiwane, iBulawayo Agenda, kanye lezinye zisadingisisa ebantwini ngaloludaba andubana zithathe isinqumo esipheleleyo. Inhlanganiso lezi zingezelela zisithi inengi labantu lifuna ukwamukela lolugwalo.
Ezinye inhlanganiso zithi zimelele ukubona ukuthi amabandla ezombusazwe awasoze aluguqule lolugwalo andubana athathe isinqumo esipheleleyo.
Isikhulumi sebandla le ZANU PF UMnu. Rugare Gumbo utshele iStudio 7 ukuthi ibandla lakhe lizathatha isinqumo esipheleleyo ngokuthi liyamukela ugwalo lweDraft Constitution kumbe hayi ngolweSithathu. Amacele womabili awe MDC aselwamukele.
Kusenjalo, inhlanganiso elwela amalungelo oluntu eye Women of Zimbabwe Arize ithi iyalwamukela ugwalo lweDraft Constitution ngoba beselulindelwe okwesikhathi eside.
Isiphathamandla salinhlanganiso uNkosazana Magodonga Mahlangu uthi lanxa ugwalo lolu lungamumathanga obekufunwa ngabantu ngendlela efanayo, kunengi okumqoka olulotshwe kulo okwamukelekayo.
Kusenjalo, inhlanganiso ekhankasela ukulotshwa kutsha kwesisekelo sombuso eye National Constitutional Assembly (NCA) yona ethi kayemukeli ugwalo lweDraft Constitution ithi izaluthola usekelo kwezinye inhlanganiso ezizimeleyo kanye lamabandla ezombusazwe.
