Inhlanganiso elwela ilungelo loluntu eye Aids Free World ichaye eleZimbabwe emphakathini emhlangagweni we International Aids Conference owenzela eVienna kwele Austria. Emhlanganweni wayo lentathelizindaba, ikhuthaze inhlanganiso ze United Nations Security Council le SADC ukuthi ziqonde uMongameli Robert Mugabe ngodaba lodlakela ngezikhathi zokhetho. IAids Free World ithi izakusa ugwalo lokuhlukuluzwa kwezizalwane zeZimbabwe, ikakhulu abesifazane edale le International Criminal Court of Justice.
Kusikhatshana esedluleyo inhlanganiso le yethule ugwalo oluveza udlakela olwenzakale ngaphambilini kokhetho luka 2008. Ugwalo lolu luthiwa Electing to Rape Sexual Terror in Mugabe’s Zimbabwe, lapho ekhulume khona labesifazane abangamatshumi ayisikhombisa belandisa ukudlwengulwa abakwenziwa ngabacatshangelwa ukuthi ngabe ZANU PF ngokhetho luka 2008.
Abakhulume emhlanganweni wangolweSithathu bagoqela omunye waba qondisi be Aids Free World uMnumzana Stephen Lewis lomcebisi kwezemithetho enhlanganisweni le uNkosazana Shonali Shome kanye loNkosazana Thabitha Khumalo ofike nje engacatshangelwa wahle wanikwa ithuba lokuthi akhulume. UNkosazana Khumalo ekhuluma ekhala uthe ibandla leMDC selehlulekile ukuqeda udlakela wacela inhlanganiso zomhlaba ukuthi zingenele.
Ngemva komhlangano lo uBrenda Moyo uxoxe loNkosazana Khumalo oze emhlanganweni lo njengomgcinisihlalo wekhomidi ye Sadc Parliamentary Forum on Hiv/Aids. UNkosazana Khumalo uthi bazakwamukela lonke uncedo olungeza ukuphathisa abesifazane beZimbabwe ababhekane lohlupho lokudlwengulwa.
Kusenjalo ukwethulwa kokuphumelela komuthi wama Anti-Retrovals oyi gel kumbe amafutha abesifazane abangawugqoka ngasese kubikwa kuyinguquko enhle ezakupha abesifazane isikhali sokuzivikela ekuthatheni igcikwane le HIV/Aids. Umuthi lo othiwa yi Tenofovir uzanywe kwabesifazane beSouth Africa watholakala ukuthi ulakho ukubavikela ukuthatha igcikwane ngesilinganiso se 39%. Kodwa abesifazane esikhulume labo bathi lokhu kungcono kulokuthi kungabi lalutho. UBrenda uphinde waxoxa loDokotela Samukeliso Dube osebenzela inhlanganiso ye Global Campaign on Microbicides othi umuthi lo ulakho ukufika masinyane kubomama beZimbabwe.
