Omkhulu wamapholisa uCommissioner-General Augustine Chihuri ubikwa esethembise inhlanganiso elwela amalungelo abesifazanae eye Women of Zimbabwe Arise ukuthi uhulumende uzahlolisisa ubunzima obubhekane lezibotshwa zesifazana ezitokisini, ikakhulu ngokuphathelane lemvunulo yangaphansi kanye lokuswelakala kokusebenzisa nxa besesikhathini.
Amalunga eWOZA ahambisa uChihuri emthethwandaba esola ukuthi izibotshwa zesifazana ziphathwa njenge zesiliza lanxa kusobala ukuthi zilendingeko ezitshiyeneyo.
Inhlanganiso le ithi ababotshiweyo nxa bengakayi emthethwandaba kuthiwa besale begqoke impahla yaphezulu eyodwa leyangaphansi eyodwa kuphela, okubamba ngamandla abesifazana ukuthi besale leziketi kumbe izigqoko bekhutshiswe isigqoko sangaphansi -sona esimqoka nxa besesikhathini.
UNkosazana Magodonga Mahlangu, isiphathamandla senhlanganiso yeWOZA utshele uSithandekile Mhlanga weStudio 7 ukuthi uChihuri kavumanga okunye abakhonona ngakho njalo amagqwetha enhlanganiso yakhe aselubuyisele loludaba emthethwandaba.