Inhlanganiso elwela amalungelo abantu abaphila legcikwane le ngculaza eye Zimbabwe AIDS Network isihambise ibhanga elikhulu le lizwe ele Reserve Bank emthethwandaba isithi leli bhanga layithathela imali efika ingxenye yesigidi samadola ngomnyaka ka 2008 kukhankaselwa ukhetho elizweni.
IZimbabwe AIDS Network ithi imali le yayingeyokuhlawula indleko zenhlelo zabantu abaphila legcikwane lengculaza kanye lomkhuhlane weAIDS njalo icabangela ukuthi iRBZ yanika ibandla le ZANU PF imali le ukuthi iyisebenzise ukukhanskasela ukhetho luka 2008.
Iziphathamandla zalinhlanganiso zivumile ukuthi sezise iRBZ emthethwandaba kodwa azithandanga ukukhuluma ngaloludaba zisithi ayisizo eziluse kumaphephandaba.
Ukuze sihlaziye loludaba, uSithandekile Mhlanga uxoxe loMnu. Kucaca Phulu igqwetha, yena othi udaba lolu luzakhuthaza abanye abalahlekelwa zimali zabo ngendlela efanayo ukuthi badinge uncedo emthethwandaba.