Inhlanganiso ezalobela ukuphiwa amalayisensi okusakazaka seziphiwe ithuba lokwazisa uzulu ukuthi zingobani. Phansi komthetho we Broadcasting Services Act, inhlanganiso lezi ezilitshumi lanhlanu, kumele ziziveze kungekedluli amalanga ayisikhombisa ukwenzela ukuthi abalezikhalazo bazise uhlangothi lweBroadcasting Authority of Zimbabwe.
Lokhu sekuveze mgceke inhlanganiso ebezikhanya zingafuni ukwazakala ukuthi zaloba zidinga amalayisensi. Enye yalezinhlanganiso yiZimpapers edinda iphephandaba le The Herald, Chronicle lamanye, lemisakazo ethi owe Voice of the People leVisions Radio eyabasakazi abalodumo uEzra Sibanda loEric Knight. Ezinye inhlanganiso zilokhu zingakazakali.
Kuzaphiwa amalayisensi inhlanganiso ezimbili kuphela. Isicelo se Zimpapers yiso esesidale inkulumo ngoba linhlanganiso, etheswa icala lokuhlambaza abangaboni ngelihlo linye leZanu PF, isifuna ukusakaza.
Ingcwethi ecubungula ezombusazwe, uMnu. Bekithemba Mhlanga owake wasebenzela umsakazo we ZBC uthi lanxa iZimpapers isemthethweni ngokudinga ilayisensi nxa ingayiphiwa kuzadala inkulumo.