Abakhokheli bedale lephalamende ababona ngokuqhutshwa kohlelo lwesisekelo sombuso esitsha iParliamentary Select Committee-COPAC babelomhlangano lenhlanganiso ezimela izizalwane zeZimbabwe eSouth Africa namhla eJohannesburg.
Injongo yomhlangano lo ibingeyokubonisana ukuthi izizalwane zeZimbabwe ezihlala kwele South Africa zingaphatheka njani kuhlelo lokwamukelwa kwemibono kazulu ezangena kusisekelo esitsha.
Akade besemhlanganweni lo ngabagcinisihlalo beCOPAC, uMnumzana Paul Mangwana, uMnumzana Douglas Mwonzora, lomeli kaMnumzana Edward Mkhosi.
Kuvunyelwene ukuthi inhlanganiso lezi ziqoqe imibonono evela kumalunga azo eminengi, kwethulwe ugwalo oluzanikezwa inkokheli yeCOPAC linyanga ingakapheli.
UBrenda Moyo we studio 7 ukhulume lomgcinisihlalo weMDC ekhokhelwa nguMnumzana Morgan Tsvangirai eSouth Africa uMnumzana Austin Moyo ositshela ngomhlangano wanamhlanje.
Kunjalo nje, inengi lezisebenzi eziqoqa imbono kazulu ezangena kusisekelo sombuso esitsha selizwe zibikwa zingakabhadalwa imali yokuqhuba lumsebenzi nguhulumende kanye lenhlanganiso ye United Nations Development Fund.
Lokhu kwenzakala inengi lezigaba zelizwe sezilugqibile loluhlelo, njalo ezinye seziluphetha.
Umnumnumzana Believe Gaule, isiphathamandla sekomidi yedale lephalamende ebona ngokulotshwa kutsha kwesisekelo sombuso, eyeCOPAC, uthi ezinye izisebenzi bezisala ukunikeza iziphathamandla zeCOPAC ingwalo ebezisetshenziswa kuloluhlelo zizithi zifuna iholo lazo phambili.
