Amalunga eWomen of Zimbabwe Arise, iWOZA angamatshumi phose ayisikhombisa, agoqela inkokheli yalinhlanganiso, uNkosikazi Jenni Williams loNkosazana Magodonga Mahlangu abotshiwe eHarare lamuhla etshengisela, esola ukuqunywa kukagetsi mahlayana yinkampani kagetsi eye Zimbabwe Electricity Supply Authority, iZESA.
Kubikwa kubotshwe njalo umfanyana omncinyane, ongenele lokhu kutshengisela ezitaladini, ngoba ebikwa esola ukuqunyelwa ugetsi nxa esenza umsebenzi wakhe wesikolo, kanye labesilisa abe Men of Zimbabwe Arise abahlanu.
Inengi likhululwe ngolweSine ntambama, kwasala abane kuphela, uWilliams, uMahlangu, uClara Manjengwa lo Celina Madukani bona abazalala esitokisini.
USithandekile Mhlanga we Studio 7 uxoxe lesiphathamandla seWOZA, uNkosazana Nolwandle Simunyu ochasisa okwenzakeleyo ekutshengiseleni lokhu.