Inhloko kahulumende uMnu. Morgan Tsvangirai uthi inkulumo ezilobutshapha phezu kodaba lokhetho ziphazamisa imizamo kahulumende yokuhuga osomabizimusi bangaphandle kwelizwe ukuzosebenzela kuleli.
Intathelizindaba yethu uMark Peter Nthambe ubika ukuthi uMnu. Tsvangirai uthe okunye okwenza ukuthi osomabhizimusi bemazweni bengavuli amafekithali eZimbabwe yikuthi abebandla le ZANU-PF batshona bekhulumela eceleni besethusela ukuthi bafuna ukuthathela abamhlophe amankampani nxa amazwe entshonalanga engesulanga izijeziso zenotho.
Abanye abakhulume kulumhlangano oqoqwe yinhlanganiso ye Euromoney ngumphathintambo wezemali uMnu. Tendai Biti, umphathintambo wezokuthuthukisa inotho uMnu. Tapiwa Mashakada kanye labamele amankampani atshiyeneyo akwamanye amazwe lawe Zimbabwe.
Ingcwethi kwezombusazwe njalo engumqondisi we Bulawayo Progressive Residents Association uMnu. Roderick Fayayo uthi kuyamangalisa ukuthi uMongameli Robert Mugabe wehlulekile ukuya kwethula umbiko oqakathekileyo emhlanganweni wezonotho lo, owe Zimbabwe Investment Conference ukwenzela ukukhanga osomabhizimusi bemazweni ukuthi bazevula amankampani abo kwele Zimbabwe.
