Inkulumo zokulungisa ukungezwanani phakathi kwamabandla ezombusazwe akuhulumende womanyano zibikwa zizaqhubekela phambili lanxa uMnu. Patrick Chinamasa, isiphathamandla sebandla le ZANU PF ebikwa ethe ibandla lakhe alisafuni ukuqhubeka liphathisa kulezinkulumo.
Uhulumende we South Africa uthi uqhubekela phambili ngalezinkulumo njalo akulabandla elike lamazisa ngokuthi alisafuni ukuphathisa kulezinkulumo, kukanti lephephandaba le The Herald elalamuhla lizithele ngaqandayo ngamazwi kaMnu. Chinamasa, lisithi yena uChinamasa uthi lezi nkulumo ziqhubekela phambili.
Iqula elivela kuhulumende we South Africa liselizweni lapho elisakhulumisana lenhlanganiso ezizimeleyo lamanye amaqembu atshiyeneyo ngengxabangxoza eselizweni.
UMnu. Effie Dlela-Ncube, ingcwethi ecubungula ezombusazwe, utshele uSithandekile Mhlanga we Studio 7 ukuthi kuqakathekile ukuthi inkulumo lezi ziqhubekele phambili ukwenzela ukuthi kuqhutshwe ukhetho olukhululekileyo.