Intatheli yephephandaba leStandard koBulawayo uNqobani Ndlovu ulele esitokisini okwesibili NgoLwesine ngoba amapholisa alile ukumusa emthethwandaba.
UNdlovu wetheswa icala lokuloba udaba lwamanga ngamapholisa oluphume ngeSonto. Igqwetha lakhe uMnu Josphat Tshuma utshele iStudio 7 ukuba ukhweze isicelo edale leHigh Court sokuba akhululwe.
Embikweni awethule ngoLwesine, obona ngokwethulwa kwembiko esipholiseni uMnu Oliver Mandipaka uthe udaba olulotshwe nguNdlovu mayelana lokuqhatshwa kwabalwa impi yenkululeko bephiwa izikhundla esipholiseni lungcolisa isimo samapholisa.
Inhlanganiso emela intathelizindaba kweleNorwey, iNorwegian Union of Journalists silobele uMongameli Mugabe loMnu Morgan Tsvangirai incwadi isithi kumele balaye amapholisa ekhulule uNdlovu.
Abasebenza laye abahambe bayambona esitokisini seCentral Police Station bathi uNqobani ubekhanya ethithibele lumhlakazile uvalo.
Umgcinisihlalo wenhlanganiso yeZimbabwe Union of Journalists uMnu Dumisani Sibanda utshele uNtungamili Nkomo ukuba badane kakhulu ngokubotshwa kukaNdlovu.
