Intsha yecele leMDC elikhokhelwa nguMnu. Morgan Tsvangirai ingene ezitaladeni zeMasvingo ngoLwesihlanu itshengisela isithi ifuna amapholisa akhulule umkhokheli wayo, uMnu. Solomon Madzore.
Ukutshengisela lokhu osekuphiwe igama elithi “Free Solomon Madzore Campaign” yingxenye yemikhankaso enziwa elizweni jikelele ngenjongo yokubamba ngamandla amapholisa ukuthi akhulule uMadzore labanye abayisithupha ababotshwe ngoMfufu nyakenye besetheswa icala lokubulala ipholisa.
Umthethwandaba we High Court uphe imvumo ababotshwe loMadzore ngolweSihlanu ukuthi bayekwelatsha amanxeba abawathola ngokutshaywa ngamapholisa besitokisini.
EGweru intsha yebandla leli ebithwele amabhakane athi uMadzore akhululwe ingenele ukutshengisela okukade kuqoqwe yinhlanganiso yezakhamizi, iGweru Ratepayers’ Association.
Unobhala jikelele wentsha yebandla leli, uMnu. Promise Mkhwananzi utshele uChris Gande weStudio 7 ukuthi ukutshengisela kwabo kuzakwenziwa emadolobheni wonke elizwe kugqitshwe ngokutshengisela okukhulu okuzenziwa ilizwe lonke.